تجهيز الطيور قبل السباق
 

السلام عليكم هواة نادي الكويت للحمام الطيار

اليوم بنضبط الحمام قبل السباق..

تعال الصباح قبل لا تطلع الشمس ونظف التشميسه مالت الحمام ..طلع الحمام

وخلهم اللين الساعه 10 بعدين اعطي كل طير 6 جولي خوراق..

.(ملعقه صغيره درشك...2 تباشير قياس حبة شنا...2 هيل حبشي..50 بذام)

بعد ماطعتي الطيور دخل الماي وخلهم يشربوا لحد ما يرتوا وطلع الماي وخلهم

في التشميسه الساعه 12 دخل الماي مره ثانيه .

الساعه 2 او الي تشوفه مناسب لطيورك عطهم الاكل (الباجره ) خلهم 5-10 دقايق

بعدين شيل الاكل ودخل الماي وخلهم يشربوا زين زين ولازم تشوف الطير اللي ما يشرب

عطه بسرنج..بعدين دخل الطيور وسكر عليهم الجال

عشان الدفئ والحراره(تساعد عالهظم)

الساعه 9 نظف ريش الطيور وغسل الارجل ودهن الاصابع

بشوي زيت عشان من تتيبس اثناء الطيران ..

عطهم 2 قولي خوراق مع (دواء المسك ساده) وشربهم ماي بسرنج.

وسكر عليهم زين وبند اليت وخلهم يناموا...تعال قبل الطيران بساعه وشوف الطيور

اللي تشوفه مهظم ونشيط وحركة طيبه شربه 5سس ماي وطيره فالسباق

واللى تشوفه ما مهظم وراسه كاش وتحس انه فيه تعب خله لا طيره

(اذا بطير 7 طيور جهز 10 )اذا تعب عنك طير البديل جاهز

احبتي فالله هذه المعابله بشكل بسيط اتمنى اني وفقة فالموظوع

أخوكم سوجر

مشكور ماقصرت اخي استاذي سوجر على المعلومات الطيبه


اخوك
الصابري
(لندن)

السلام عليكم

ما شفت عادل اخوي سوجر? ما تلاحظ انه يروغ من بعض المواضيع كما يروغ الثعلب وعلى طاري الثعلب يقولك كان فيه ثعلب مار وشاف ديك يذن فوق شجره قال انزل خلنا نصلي جماعه هههه اما العزيز سالم الشمري يكتب اما امه مثل ماينطقها امه ولا ابوه هههه , حبيب يالسلم.

وييينك يا عدول هالمواضيع اللي نبيك تسئل فيها وانت ماغير تسولف عند ابو متعب وابو متعب يطير ويحصد جوايز وانت خلك بس على الطير طويل والطير قصير هههه وفلان طير 450 وما رد الا 50 هههه. حبيب ياعدول اتغشمر وياك والله يعينا عالرد هههه. عد من 1 الى 10 وخذ نفس عميق وعندك سوجر هههه.

استاذ سوجر نرجع للموضوع وعندي بعض الاسئله لخوك العليمي الجديد:

1. ياليت اذا ذكرت عشبه تذكر ما يقابلها بالعربي ان كنت تعرف ذلك, لونها طبيعتها, مثل الدرشك وهل استطيع اعمله بطريقه اخرى غير الخوراق بان اضعه في الماء وكيف الطريقه? هل التباشير هو نفس ما يستخدم في المدارس?

2. استاذي سوجر عشان ترسخ المعلومه لدى الطالب لابد له ان يعرف العله اي السبب. لذلك لماذا نرتب الماء? ومتى نبدا في ترتيب الماء هل هو في بداية البرتات? مالذي يحدث اذا لم نرتب الماء? هل ترتيب الماء ضروره في الصيف والشتاء ايضا ام في الشتاء يختلف الترتيب, كيف?

شاكر لك استاذي سوجر على رحابة صدرك وان شاء سوف اعود ببعض الاسئله ان وجدت بعد ما تجاوب على اللي فوق والله يعينك ويجزاك خير.

العفوا اخوي نور وانشاء الله اتكون نور المنتدى

اسموحه اذا قصرنا ...اخوك سوجر

لا ابشرك اخوي الهيل اعرفه وعشان اكد لك ترى ناخذ الحبوب اللي فيه ونرمي القشر. لذلك سألت عن الدرشك هل يطحن بالكامل كما هو معليش تحملني وانا اخوك.

دخلت على الموضوع اللي ذكرته لكن ما وجدت كيف الطريقه اخوي سوجر. انت ذكرت فقط تستخدم ماي بارد خلطه ( درشك - بخارى - تباشير) لكن ماذكرت الطريقه والمقادير التي تحضر بها يعني هل تطحن وتنقع ولمدة كم وهل تصفى ام لا واذا ممكن تقول لنا صلاحية هذا الخليط كم تقعد يوم يومين.

كذلك اخوي سوجر اذكر اني قريت لك في احد الردود تقول خل طيرك بارد طول اليوم قبل المطيار خصوصا في الصيف سؤالي كيف اخليه مبرد طول اليوم هل هو بنفس الخلطه المذكوره فوق ام بغيرها ياليت توضح اخوي سوجر.

وبعدين الله يسامحك اخوي سوجر تقول اذا حطيت التباشير فلسانك يلزق , طيب كيف اسولف معكم فالمنتدى اذا لزق لساني هههه. اتغشمر وياك اخوي سوجر بالعكس بهذه الطريقه وضرب الامثال نتعرف على طبيعة الاشياء.

انت ابو الاساتيذ اخوي سوجر جزاك الله خير ورحم الله والديك وما جا منك الا الزين بارك الله فيك.

السلام عليك اخوي نور

استاذي ممكن انا انزل موظوع او معلومه

ولما محد يسال فالتفاصيل اقول ممكن الشباب يعرفوا

لذلك ما ادقق فالتفاصيل لكن لو سالني اي واحد

تأكد اني راح اجاوبه واذا ما فهم بعد بشرحله

استاذي أنا وغيري اللي يشاركوا فالمنتدى ما نستفيد غير حب الناس

ومعرفة هواة من دول الخليج للاستفاده لا غير واذا هاوي فنان مثلك يعرف معلمومات قيمه

ترى انا وغيري بنخلي الصفحه لك عشان تعبر وتسطر وتشرح العلوم الزينه..

.هذا الكلام قبل الشرح.

الماي البارد :

ملعقه درشك ..\2-4 البخارى..\4 تباشير قياس تشنا .

من الليل ويعطى الطيور بعد النزول.

الخوراق:

ملعقه درشك...2 الهيل حبشي (البذور) ..2 تباشير..\50 بذام .

يعطى لطيور فالصباح لتبريد الطيور .


اخوكم فالله سوجر

وعليكم السلام ورحمة الله وبركاته

اخوي سوجر ياليت تعيد قراءت ماكتبت زين لاني ماغلطت عليك وان كان فيه شي يستحق الزعل كما ذكرت فهو للاخوين عادل وسالم واقدم اعتذاري لكم جميعا ان كان في خطركم شي (ترى يالربع مليت من كثر ما اقدم معاذير هههه).

اخوي سوجر بقولك معلومه (على طريقتك هههه) ترى فالوصف الرجال يقولون فلان جمل او مثل الجمل لانه يتحمل ويشيل مثل الجمل او يقولك فلان حصان لانه يرفع نفسه عن بعض الامور وانا ما اخترتك انت والاخوان الا لانكم رجال تحملون ووسيعين بنايد من غير قصور فالباقين.

على العموم بيض الله وجهك اخوي سوجر انت مالك فالمنتديات الا سنه وكتبت كل هالمعلومات اللي استفدنا منها جميعا وغيرك من يوم بدت المنتديات وهم فيها ما كتبوا سطر واحد, رحم الله والديكم وغفر الله لنا ولكم اجمعين والسلام ختام.

ملاحظه اخيره: حاول دائما اخوي سوجر تشيل العصا من الضاد مثل الموضوع, الضوء, واضح الوضوح وتضعها في الظ مثل الظل, الظلام, الظهر, ظاهر الظهور. اذا صعب عليك الامر, اترك العصا فتركها اخف ضررا من وضعها للمشاهد.

خي العزيز واستاذي سوجر اخونا العزيز نور لم يقصدك انت اهو يكن لك كل الأحترام الكلام موجه الى عادل واخونا العزيز نور يتغشمر يلعكس اتحفنا اخي العزيز نور بتعليقه على اخونا الكبير عادل

اخوكم
الصابري

(لندن)

سلام عليكم سديق سوجر انته صحيح مافيه لازم شرح حق هازا نفر نور. انا فيه معلوم هازا نفر كويس هوه سديق مال انا يمكن بيت واحد كيلو فرق لكن هوه مشكله قرقر كتير فايده قليل.

كم مره يجي حق بيت انا قول يبغا يطير حمام في صيف ميه ميه انا كلم مافيه مشكل انته لازم فيه معلوم تبريد كويس عشان جو حار لازم فيه معلوم درشك هوه فيه كلام ايش فيه فرق درشك ناردانه. انا كلم مافيه فرق انته جرب بس هوه مافيه جرب وكل صيف يجي بيت انا نفسه سؤال شتا مايجي.

شهاده لله سديق سوجر هوه استاز كبير في شتا وجو بارد لكن صيف ماعنده ماعند جدتي.

هههه هههه طيب يا مقصود هاذي اخرتها. ياجماعه ماعليكم منه هالباكستاني جيته مره وسئلته سؤال وذلني فيه يقول اكفلني وطلعلي اقامه عشان اعلمك. هو من متخلفي الحج والعمره لكن اوريكم فيه ان ما بلغت عنه الجوازات يرحلونه.

فضحنا هالباكستاني هههه:d:d.

الله يقطع سوالفكم والله اني جلست اقراء الموضوع ثلاث مرات اللين فهمة

تسلم اخوي جونسرا تيدي وتسلم اخويnoor والله اني ظحكة من خاطري

أخوكم فالله سوجر

هههههههههههههههههههه اما كل صيف يجيك ههههههههههههههههه

والله يا ني ضحكت حتى انقطع الاكسجين من الغرفه هههههههههه


لا بس نوووور با ين انه خفيف دم بس الدردشة الكتابيه يا نور تختلف عن الكلام لأن تعابير الوجه تبين انت تمزح ولا تتكلم من جد فالدردشة قد تسبب حرجا للقارء خصوصا اذا كان فيها مزاح او تمثيل بليغ




سوجر بيض الله وجهك ما قصرت بس انا سعودي هههههه قسم يا اني ما عرفت وش يعني الدرشك ولا التباشير


اسف والله يا سوجر اذا كان في صور للخلطه تسهل علي اكون شاكر لك

سوجر بيض الله وجهك ما قصرت بس انا سعودي هههههه قسم يا اني ما عرفت وش يعني الدرشك ولا التباشير


اسف والله يا سوجر اذا كان في صور للخلطه تسهل علي اكون شاكر لك[/quote]

خلك فمنتدى الكويت وراح تستفيد اكثر لان

المنتديات الثانيه ما فيها كثر معلومات فيها بس كلام.... وضرابه


..سوجر

خلك فمنتدى الكويت وراح تستفيد اكثر لان

المنتديات الثانيه ما فيها كثر معلومات فيها بس كلام.... وضرابه


..سوجر[/quote]




هههههههههههههه خلك معي واخلني معك لا نوطوط كلنا في اي منتدى ثاني هههههههههه





سوجر انتا ميه ميه بس ما جاوبتني كل هذي الخلطات ما عرفت مكوناتها



الخوارق =


الهيل هل هو هيل القهوه العربيه ؟ ممكن صوره له



الدرشك ممكن صوره له


التباشير صوره له لأن عندنا التباشير هي الي نكتب فيها بالسبوره خخخخخخ







وترى انا امشارك هنا اكثر من اي منتدى ثاني لأني مالقيت الكلام المفيد الا عند استاذنا سوجر بدون مجامله والله

صباح الخير اخوي تيد الغربيه

(طبعآ قراءة المكتوب فالبدايه) الشرح

اخوي اهل الحمام انواع درجات كثيره من الهاوي العادي الى الشوق(مدمن حمام)
اذا انت تحس عمرك شوق حمام لازم ما تبخل على الطيور بأي شي يفيدهم
من اكل وادويه ونظافه يعني (فقر محبوب)
يعني خساير بس حلوه ولكل انسان هوايه
اذا اطير حمام فسباقات او بروحك بمعنى تجرب اطيورك(الشهره فالسباقات )
بروحك لو تسولف عن طيورك وانجازاتها مراح يصدقك الناس
لازم ميدان او تدعوا ربعك وخلهم يشوفوا طيران حمامك

المهم بعد هالمقدمه الطويله...

روح محل العطارين(بيع الاعشاب) الايرانيه او الباكستانيه
وقوله بصوت مسموع(جناب فيه تباشير...وبعد يريد درشك..البخارى)ووو
بيعرف انك فنان ..اما الهيل فهو الاخظر الصغير(للقهوه) والاسود الكبير(حبشي)
بتحصلهم فنفس المكان اذا حصلت المواد وما عرفة كيف الطريقه اسأل

وانشاء الله الكل مراح يقصر معاك

ملاحظه مهمه جدآ
(لازم الطيور تكون جاهزه)

أخوك سوجر...

شكرااااااااااااااااااااا استاذ سوجر

شكرا اخوي و استاذي سوجر على المعلومات الطيبة مع اني اول مرة فحياتي اسمع عن هذي الامور
لكن ان شاء الله استفيد من معوماتك و معلومات الاستاذة الموجودين فالمنتدى

الاخ العزيز الاستاذ سوجر

والله انا مقدر وعارف حساسية هذا الموضوع بالنسبه لك ولكن وش نسوي ما لقينا الا سوجر اللي تلقى عنده لكل سؤال جواب ولا عنده تحفظ فلك منا كل الشكر والتقدير واسمحلي ببعض الايضاحات:

1. ذكرت ان خلطة الماء تعطى للطيور بعد النزول والخوراق الساعه 10 للتبريد, ما قدرت اجمع بينهم ممكن توضح, هل تعطى الاثنين في نفس اليوم لنفس الطيور.

2. ذكرت في معابلة الطيور بعد النزول في الصيف انه لازم تعطي الطير الساعه 9 في الليل شوي حراره عشان ما يخترب واحد قولي بزام مع منكا. هل ممكن نستخدم هذا كتسخين ايضا وكم قولي.

3. هل نبرد ايضا في الشتاء ولا على طول تسخين وهل تزيد جرعة التسخين في الشتاء عنها في الصيف.

4. مافيه تسخين يتم في النهار وليش دايم الشغل في الليل من بعد الساعه 9 ;).

اصالة عن نفسي ونيابة عن اخواني الطرمان هههه:d.

اتمنا اني وفقة فالطرح واسف عالقصور..

تسلم يالغالي ...اخوكم سوجر

مساء الخير اخواني الاخ سوجر مايقول غير الحقيقه الله يجزاه خير ويعتبر من كنوز الخليج يذكرني في احد الاخوان في منتدي حمام الامارات وهو الفاروق انسان الله يذكره بلخير استفاد منه ناس كثر وانا اولهم .

اخوي تيدي الغربيه يسئل عن الدرشك
هو الزبيب الجبلي .

اخوي سوجر لو سمحت ايهم افضل لتسخين الطير المنكه او الماء(باني قرم)

تحياتي
ابوخالد

اخوي سوجر لو سمحت ايهم افضل لتسخين الطير المنكه او الماء(باني قرم)

أخوي شقا المنكا عباره عن سكر واحماض امينيه
(كيربوهيدرات ) والاياف (طاقه )
ويساعد في عملية هظم الطير
يعني يفيد الطيور اكثر من الماي الحار
يخلط مع البيذام ويستخدم بعد رجوع الطيور من السباق
لارجاع صحة الطيور وما تكون بارده فالليل(يمرض الطير)

الماي الحار عباره عن مواد تفاعليه حارقه
و تحفيز للطيور (تخلي جسم الطير حار)
اول ما تطيره الصباح يروح بند(يبحث عن المنطقه البارده )
لكن بعض المرات ماتركب الخلطه مع الطير وتسبب له مشكله
بدل ما يرتفع ينزل بسرعه(يحترق من الحراره الزايده)
يعني قياسات ولكل هاوي فكر وترتيب مع طيوره وشوا اللي يناسبها
وانا ذكرت فاحد الموضيع لازم الهاوي يعرف كل طير وترتيبه

تسلم اخوي بوخالد ...أخوك سوجر

بيض الله وجهك ابو مسلم كفيت ووفيت وهذا عشمنا فيك دائما.

مشكوووور اخوووي سوجر والله يعطيك العاافيه

تسلم اخواني نور وفواز عاللكلام الطيب

والله يوفقكم للاحسن انشاء الله

أخوكم فالله سوجر

اخوي سوجر وش القولي ؟؟؟؟؟

مساء الخير اخواني فالله

اخوي تيدالغربيه القولي يعني (مدور او او قياس او حجم )
لما تعمل الخوراق وتريد تعمل كور او حبيبات مدوره للحمام لاعطأها عن طريق الفم
هذه العمليه (تكوير البيذام) تسمى قولي بيذام ...

أخوك سوجر

يعطيك العافيه سوجر الحين عرفت ان القولي كورة البيذام

مرحبا اخوي عبدالله ..وتسلم على المرور

اخوي الله يشهد اني اكتب المواضيع وانا افكر فالشوقي المبتداء
انا عارف انك تريد تكتب الامور بادق التفاصيل وهذا حقك
لكني لما اكتب احاول ابسط الاجابه بدون الخوض في عوار الرأس
(مروريد.. وسورنجان.. ودواء المسك ساده وجوهردار..وعرق.. وووو)

لانها امور بتخلي الهاوي المبتداء يدخل في تسألات كثيره ..أستاذي
كلما كانت المواضيع سهله وبسيطه كانت خفيفه عالهاوي وانشاء الله
بعد ما يطيروا الحمام بندخل فالتفاصيل هههههههههه

أخوك سوجر

مشكووور اخوي سوجر

مواضيعك مفيده وانا تابعت هذا الموضوع كاملا الان
ترتيب تشكر عليه

الاستاذ الفاضل سوجر

اما آن الأوان للدخول في التفاصيل , من بدأ بالمكارم فليتمها يا ابا مسلم.

مشكور اخوي سوجر على الموضوع الاكثر من رائع

ومبدع في كل المجالات

تقبل مروري

الاخ عبدالله

ممكن نعرف النقاط اللي لك تحفظ عليها ولماذا.

موضوع هااام جداا لجميع الهواااه
والله يعطيك الف عاافيه يااخوي سوجر

جمعه مباركم عالشوقيه...

اخوي بويوسف اولآ حياك الله معنا فمنتدى الكويت واحنا اتشرف فيك...

اخوي الحمام الطيار علم وثقافه وسباقات ومنافسات قويه...
اذا كنت هاوي تعشق كسر الارقام والخصوم
فبهذه الطريقه راح تكون الفصفوف الاخيره
اما اذا كنت هاوي تتسلى في وقت الفراق بمشاهدة الطيور وهي تحلق
فهذا غير ....اما جارك الي عطاك هذه الطريقه فالله يسامحه
لانه علمك امور خطأ فترتيب الحمام ..فالحمام الطيار مثل ابطال الانجازات
يحتاجوا تدريب وبناء الجسام قويه تتحمل الضروف وتريد نظام غذائي
وراحه وووووو ولكي تنتج ابطال لازم يكون عندك خطوط(ازواج) ابطال

يعني السالفه موب اكل وكش حمام
السالف اكبر من هاوي يتسلى بوقت فراقه..
الله يعطيك الصحه والخير وان شاء الله بعد ما تمر على مواضيع المنتدى
وتقرئ كم حوار راح تكتشف امور طيبه فالحمام ...
وراح تغير فكرتك عن جارك الطيب..

أخوكم فالله سوجر